विश्वकप क्रिकेट २०१५ : ब्याटिङका सुपरस्टार...
काठमाडौं, चैत १५ - अष्ट्रेलियाले उपाधि जितसँधै विश्वकप क्रिकेट २०१५ सकिएको छ । यो विश्वकपमा केहि नाम चलेका र आशा गरिएका खेलाडी फ्लप भए भने केहि खेलाडी नयाँ स्टार बनेर उदाय । यो विश्वकपमा ब्याटिङतर्फ उत्कृष्ट प्रदर्शन गरेका १० ब्याट्सम्यान :
१. मार्टिन गुप्टिल, न्युजिल्याण्ड
न्युजिल्याण्डका मार्टिन गुप्टिल एघारौं विश्वकपमा सर्वाधिक रन बनाउने खेलाडी बने । आफ्नो टोलीलाई विश्वकपको उपाधि जिताउन नसकेपनि गुप्टिल विश्वकपको इतिहासमा एकै खेलमा सबैभन्दा धैरै रन बनाउने खेलाडी समेत बने । वेश्ट इण्डिजविरुद्धको खेलमा अविजित २ सय ३७ रन बनाएका गुप्टिलले विश्वकपमा खेलेका ९ खेलमा ६८ दशमलव ३७ को औसतमा कुल ५ सय ४७ रन बनाए । गुप्टिलले यस विश्वकपमा दोहोरोशतक सहित २ शतक र एक अर्धशतक प्रहार गरे । गुप्टिलले यो विश्वकपमा सर्वाधिक ५९ चौका प्रहार गरे ।
२.कुमार सांगाकारा, श्रीलंका
विश्वकपमा एकमाथि अर्को कीर्तिमान बनाएका श्रीलंकाका कुमार सांगाकारा यस विश्वकपमा सर्वाधिक रन हान्ने खेलाडीको सूचिमा दोश्रो स्थानमा रहे । ७ खेलमा ४ शतक प्रहार गरेका सांगाकाराले १ सय ८ को औसतमा ५ सय ४१ रन बनाए । उनले विश्वकप तथा एकदिवसीय क्रिकेटमा लगातार चार शतक प्रहार गर्ने कीर्तिमान पनि बनाए । उनी विश्वकपमा सर्वाधिक आउट गर्ने विकेट किपर समेत भए । सर्वाधिक चौका हान्ने खेलाडीको सूचिमा ५७ चौकाका साथ दोश्रो स्थानमा रहेका सांगाकाराले यसै विश्वकपबाट सन्यास समेत लिएका छन् ।
३.एबी डिभिलियर्स, दक्षिण अफ्रिका
विश्वकपमा कीर्तिमानको ओइरो लागाउने अर्का खेलाडी हुन दक्षिण अफ्रिकाका एबि डिभिलियर्स । एघारौं विश्वकपमा निकै विस्फोटक ब्याटिङ गरेका डिभिलियर्स सफल ब्याट्सम्यानको सूचिमा तेश्रो स्थानमा रहे । सर्वाधिक छिटो एक सय ५० रन बनाउने कीर्तिमान यसै विश्वकपमा बनाएका डिभिलियर्सले ८ खेलमा ९६ को औसतले ४ सय ९२ रन बनाए । १ सय ४४ को स्ट्राईक रेटमा ब्याटिङ गरेका डिभिलियर्सले एक शतक र ३ अर्धशतक प्रहार गरे । उनी सर्वाधिक छक्का हान्ने खेलाडीको सूचिमा २१ छक्काका साथ दोश्रो स्थानमा रहे।
४.ब्रेण्डम टेलर,जिम्बाबे
आफ्नो टोली पहिलो चरणबाटै बाहिरिएपनि जिम्बाबेका कप्तान ब्रेण्डम टेलर भने यस विश्वकपको सफल ब्याट्सम्यानको सूचिमा चौथो स्थानमा आए । भारतविरुद्ध समूह चरणको अन्तिम खेलमा जिम्बाबेका लागि अन्तिम खेल खेलेका टेलरले प्रतियोगितामा २ शतक र एक अर्धशतक प्रहार गरे । उनले खेलेका ६ खेलमा ७२ को औसतमा कुल ४ सय ३३ रन बनाए । १ सय ६ को स्ट्राईक रेटमा ब्याटिङ गरेका टेलर सर्वाधिक चौका प्रहार गर्ने खेलाडीको सूचिमासमेत सातौ स्थानमा रहे ।
५.शिखर धवन, भारत
भारतीय ब्याट्सम्यानहरुले विश्वकपमा खासै राम्रो प्रर्दशन नगर्दा सफल ब्याट्सम्यानको सूचिमा भारतका एकमात्र ब्याट्सम्यान शिखर धवन पाँचौ नम्बरमा रहे । प्रतियोगितामा २ शतक र १ अर्धशतक प्रहार गरेका धवनले ८ इनिङमा ५१ दशमलव ५ को औसतमा कुल ४ सय १२ रन बनाए । सर्वाधिक चौका प्रहार गर्ने खेलाडीको सूचिमा ४८ चौकाका साथ तेश्रो नम्बरमा रहेका धवन यस विश्वकपमा ४ सय रन कटाउने एकमात्र भारतीय ब्याट्सम्यान हुन ।
६. स्टेफेन स्मिथ, अष्ट्रेलिया
पछिल्लो समय निकै फर्ममा देखिएका स्टेफेन स्थिमले अष्ट्रेलियालाई उपाधि जिताउन विजयी रन बनाए । प्रतियोगिताको ७ खेलमा मात्र ब्याटिङ गरेका स्मिथले ६६ दशमलव १६ को औसतमा ३ सय ९७ रन बनाए । मध्यक्रममा निकै मजबुत ब्याटिङ गरेका स्थिम विश्वकप इतिहासमा लगातार ४ अर्धशतक बनाउने पहिले खेलाडी बने । उनले यस विश्वकपमा १ शतक र ४ अर्धशतकसमेत प्रहार गरे ।
७.तिलकरत्ने दिल्सन, श्रीलंका
श्रीलंकालाई क्वाटरफाइनलसम्म पुर्याउन महत्वपुर्ण भुमिका खेलेका तिलकरत्ने दिल्सान पनि यस विश्वकपमा सफल ब्याट्सम्यानको सूचिमा छन् । यस विश्वकपमा ७ खेल खेलेका दिल्सानले ६५ दशमलव ८३ को औसतमा ३ सय ९५ रन बनाए । प्रतियोगितामा २ शतक र एक अर्धशतक प्रहार गरेका दिल्सान सर्वाधिक चौका हान्ने खेलाडीको सूचिमा ४८ चौकासहित चौथो स्थानमा रहे । यस विश्वकपमा उनले बंगलादेशविरुद्ध नट आउट १ सय ६१ रन हानेका थिए ।
८. फाप डु प्लेसिस, दक्षिण अफ्रिका
एघारौ विश्वकपमा सफल ब्याट्सम्यानको सूचिमा दक्षिण अफ्रिकाका फाप डु प्लेसिस आठौं नम्बरमा रहे । निकै संयमित भएर खेल्ने उनले यस विश्वकपमा ७ खेलमा ६३ दशमलव ३३ को औसतमा ३ सय ८० रन बनाए । प्रतियोगितामा १ शतक र ३ अर्धशतक प्रहार गरेका उनी यस विश्वकपमा दक्षिण अफ्रिकाका तर्फबाट सर्वाधिक रन बनाउने ब्याट्सम्यान सूचिमा दोश्रो स्थानमा रहे ।
९. महमदुल्लाह, बंगलादेश
बंगलादेशलाई क्वाटरफाइनलमा पुर्याउन महत्वपुर्ण योगदान गरेका महमदुल्लाह यस विश्वकपमा सफल ब्याट्सम्यानको सूचिमा नवौं स्थानमा रहे । ६ खेलमा ७३ को औसतमा ३ सय ६५ रन बनाएका महमदुल्लाह विश्वकप क्रिकेटमा शतक प्रहार गर्ने बंगलादेशको पहिलो र एकमात्र खेलाडी हुन् । उनले यो विश्वकपमा २ शतक र एक अर्धशतक प्रहार गरे ।
१०.मिसवाह उल हक, पाकिस्तान
पाकिस्तानलाई क्वाटरफाइनलसम्म पुर्याउन सफल पाकिस्तानी कप्तान मिसवाह उल हक पनि यस विश्वकपमा सफल ब्याट्सम्यानको सूचिमा रहन सफल भए । यस विश्वकपमा उनले सात इनिङमा ५० को औसतमा ३ सय ५० रन बनाए । यस विश्वकपमा सर्वाधिक ५० रन प्रहार गर्ने खेलाडीको सूचिमा उल हक ४ अर्धशतकसहित न्युजिल्याण्डका ब्रेण्डम म्याकुलम, जिम्बाबेका सेन विलियम्स र अष्ट्रेलियाका स्टेफेन स्मिथसँगै संयुक्त रुपमा पहिलो स्थानमा रहे । यो विश्वकपसँगै उनले एक दिवसीय क्रिकेटबाट सन्यासको घोषणा समेत गरे ।
Comments
Post a Comment