भुकम्पको पिडा बिर्साउन चाहन्छन् क्रिकेटर...

नेपाली क्रिकेट टिमका व्याट्सम्यान महेश क्षेत्री
 त्रिवि क्रिकेट मैदानमा प्रशिक्षणको क्रममा 

काठमाडौ, जेष्ठ १३ - आयरल्यान्ड र स्कटल्यान्ड सुहाउँदो पिचमा अभ्यस्त हुन तयारी सुरु हुने क्रममा थियो । त्यसका लागि त्रिवि क्रिकेट मैदान कीर्तिपुरको नेट्सको एउटा विकेटमा मार्बल बिछ्याइएको थियो । बाउन्सी विकेटमा नेपाली ब्याट्सम्यानलाई अभ्यास गराउन ।

जुलाईको पहिलो सातादेखि आयरल्यान्ड र स्कटल्यान्डमा हुने प्रतियोगिताका लागि नेपालको तयारी सुरु हुनै लागेको थियो । वैशाख १२ को महाभूकम्पले देशलाई मर्कायो । नेपाली खेलकुद पनि भूकम्पको चेपुवामा पर्‍यो । कीर्तिपुर मैदान घेरिएको पर्खाललाई पूरै लड्यो । पवेलियनहरू चर्किएका छन् ।

नेट्सको पूर्वतिरको भाग अघिल्लो साताको हावा हुरीले भत्काएर ढल्ने स्थितिमा पुर्‍याइदियो । त्यहीमुनि फास्ट बलिङमा ब्याट्सम्यानलाई तिर्खान मार्बल बिछ्याइएको थियो । प्रशिक्षक पुबुदु दासानायकेको यो योजना भूकम्प र त्यसपछिको हावाहुरीले सबै उडाइदियो । वैशाख १२ को भूकम्पमा उनी क्यानाडामै थिए । त्यसको केही समयपछि प्रशिक्षण सुरु गर्न उनी काठमाडौं आए ।

वैशाख २९ को भूकम्पले उनलाई पनि छोप्यो । भूकम्पले खेलाडीहरू मानसिक रूपमा उभिनसकेका थिएनन् । दासानायके एक हप्ता नबित्दै कम्पित भएर क्यानाडा फर्किन बाध्य भए । नेपाली टोली सोमबार भिसा प्रकृया पूरा गर्न र भारतीय क्रिकेट बोर्डको आतिथ्यतामा अभ्यास गर्न भारत जाँदैछ । दासानायके त्यसको २–३ दिनपछि क्यानाडाबाट भारत पुग्ने छन् ।

खेलाडीहरू आफ्नै हिसाबमा तयारी गरिरहँदा भूकम्पलाई बिर्सिएर ठूलो लक्ष्य बोकेको नेपाली टोली सोमबार अभ्यासमा फर्किएको छ । सहायक प्रशिक्षक विनोद दासले खेलाडीहरूलाई प्रशिक्षण दिइरहेका छन् । तर नेपाल क्रिकेट संघले निर्णय लिन नसक्दा विश्व ट्वान्टी–२० छनोटलाई को सहयाक प्रशिक्षक जाने निश्चित छैन् ।

राष्ट्रिय टोलीका कप्तान पारस खड्का देशमा के भइरहेको त्यो सबैलाई थाहा नै भएको र आफुले गर्ने काम सबैले गरीरहेको समयमा प्रशिक्षण सुरु भएको बताउँछन् । ‘हाम्रो जिम्मेवारी राम्रो खेलेर देशलाई जीताउनु हो । नेपालका लागि अर्को ठूलो मौका आउँदै छ विश्वकप खेल्ने,’ पारसले भने ।

आयरल्यान्ड र स्कटल्यान्डमा नेपाल शीर्ष ६ मा पर्न सके नेपाल लगातार दोस्रो पटक विश्व ट्वान्टी–२० मा छनोट हुनेछ । सन् २०१३ मा युएईमा भएको विश्व ट्वान्टी–२० छनोटमा तेस्रो हुदैं विश्वकपको ढोका खोलेको थियो । यो नेपाली खेलकुदकै ठूलो सफलता पनि थियो । अहिले नेपाली टोलीको प्रमुख लक्ष्य पनि त्यही नै रहेकोछ, जसले भूकम्पको त्रासमा रहेको नेपालीको अनुहारमा फेरि चमक ल्याउने विश्वास पारसको छ ।

‘असर सबैलाई पारेको छ । यसमा क्रिकेट खेलाडी पनि छन । तर सधै त्यसैलाई सम्झेर हुँदैन । त्यसबाट बाहिरिनु जरुरी छ । हामी पनि देशको प्रतिनिधि हौं । वितगको समयमा क्रिकेटले देशलाई नै एक सूत्र बनाएको थियो । फेरि पनि नेपाल क्रिकेटको तर्फबाट मैदानमा राम्रो खेलेर सानो खुसी ल्याउन सक्छौं भन्ने अहिलेको हाम्रो उद्देश्य नै हो,’ पारसले भने, ‘दु:खको समयबाट हामी गुज्रिसकेका छौं । दु:खपछि सुख आउँछ भनेजस्तै हामी विश्वकपमा स्थान बनाएर खुसी ल्याउनेछौं ।’

नेपाली टोलीले भारतको हिमाञ्चल प्रदेशको धर्मशालामा २ साता अभ्यास गर्नेछ । त्यसपछि स्वदेश फर्कि नेपाली टोली युरोप भ्रमणमा लाग्ने छ । विगतको भन्दा फरक कन्डिसनमा खेल्न परेकाले नेपाललाई यसपटक चुनौती सजिलो छैन । अझ भूकम्पले नेपाली टोली पूरै प्रभावित थियो ।

‘अघिल्ला पटक पनि हामीलाई सजिलो थिएन,’ पारसले भन्छन्, ‘राम्रो खेलेर हामीले विश्वकप खेलेका थियौं । यसपटक पनि राम्रो खेल्नुपर्नेछ । विगतको समयभन्दा अहिलेको समयमा टिमदेखि खेलाडीको स्तर बढेको छ, हरेक देशको तयारी राम्रो चलिरहेको छ, त्यसले गर्दा अझ राम्रो क्रिकेट खेल्नुपर्नेछ । टिममा क्षमता छ । पहिला पनि धरैले सोचेका थिएनन् हामीले विश्वकप खेल्छ भनेर । त्यसलाई हामीले गलत सावित गऱ्यौं । अहिले धेरैले आशा गरेका छन् त्यसैले जसरी हुन्छ हामी विश्वकपमा स्थान बनाउनेछौं ।’