दोस्रो एयरबसले व्यवसायिक उडान सुरु गर्यो पहिलो उडान दिल्ली....
दोस्रो एयरबसले व्यवसायिक उडान सुरु गर्यो
पहिलो उडान दिल्ली
काठमाडौ, वैशाख ३१ - नेपाल वायुसेवा निगमले खरिद गरेको दोस्रो एयरबस लुम्बिनी ‘ए’ ३२०–२०० ले बिहीबारदेखि व्यवसायिक उडान सुरु गरेको छ । सो जहाजले बुधबार दिउँसो उडान सञ्चालन अनुमति (एओसी) पाएपछि बिहीबारदेखि व्यवसायिक उडान गरेको हो ।
दोस्रो एयरबसले बिहीबार बिहान त्रिभुवन विमानस्थलबाट ८ बजेर २५ मिनेटमा नयाँ दिल्लीको लागि उडान भरेको थियो । काठमाडौंबाट दिल्ली उड्दा १ सय ३६ जना यात्रु बोकेको सो जहाजले दिल्लीबाट काठमाडौं आउँदा भने ४७ जना यात्रु बोकेको थियो ।
गत बैशाख १७ गते नेपाल भित्रिएको न्यारो बडीको सो जहाजले दिल्ली र बैंकक उडान भर्ने निगमका कर्पोरेट डाइरेक्टर तथा प्रवक्ता रामहरी शर्माले बताए । उनले भने, 'अहिले हामीले एयरबसबाट दिल्ली र बैंकक उडान भर्ने छौं । त्यसपछि विस्तारै रुट थप्दै जाने छौं ।' लुम्बिनी नाम दिइएको यो एयरबसको ९एन-एकेएक्स कलसाइल रहेको छ । पहिलो एयरबसरको ९एन-एकेडब्ल्यु रहेको थियो ।
शर्माका अनुसार अब बोइङले हङकङ, दोहा र मलेसियामा उडान भर्ने छ ।
तीन वर्षपछि फागुन १५ यता निगमले नियमित काठमाडौं–दिल्ली उडान गरिरहेको छ। एयरबस आएपछि उसले बैंगलोर र मुम्बईमा उडान थप्नेछ। हाल जेट एयरवेज, एयर इन्डिया, इन्डिगो, स्पाइस जेट र भुटानको ड्रुक एयरले दिल्ली–काडमाडौं उडान भर्दै आएका छन्। निगमसँग अन्तर्राष्ट्रिय उडानका लागि दुईवटा एयरबस ‘ए’ ३२०–२०० र दुईवटा बोइङ–७५७ गरी ४ वटा जहाज छन्।
Comments
Post a Comment