न्युजिल्यान्डलाई २ सय १० रनको अन्तरले हराउँदै इंग्ल्यान्डले लियो अग्रता
काठमाडौं, जेष्ठ २७ । न्युजिल्यान्डलाई २ सय १० रनको फराकिलो अन्तरले हराउँदै घरेलु टोली इंग्ल्यान्डले पाँच खेलको एक दिवसीय क्रिकेट श्रृंखलामा प्रारम्भिक अग्रता लिएको छ ।
बर्मिङ्घङ्मा सम्पन्न खेलमा टस हारेर पहिले ब्याटिङ गरेको घरेलु टोली इंग्ल्यान्डले निर्धारित ५० ओभरमा ९ विकेट गुमाउँदै ४ सय ८ रनको विशाल योगफल खडा गर्यो ।
एक दिवसीय क्रिकेटको इतिहासमा इंग्ल्यान्डको यो अहिलेसम्मकै उच्च स्कोर हो। इंग्ल्यान्डका लागि जोस बट्लरले ७७ बलमा १ सय २९ रनको योगदान गरे भने जो रुटले ७८ बलमा १ सय ४ रन जोडे ।
जवाफमा ४ सय ९ रनको बिशाल लक्ष्य लिएर मैदानमा उत्रिएको न्युजिल्यान्ड ३२औं ओभरमा १ सय ९८ रन बनाउदै अलआउट भयो । न्युजिल्यान्डका लागि रोस टेलरले ५७ र केन विलियाम्सनले ४५ रन जोड्नुबाहेक अन्य ब्याट्सम्यानले उल्लेखनीय प्रदर्शन गर्न सकेनन् ।
न्युजिल्यान्डलाई सस्तैमा समेट्नेक्रममा स्टेभन फिन र अदिल रसिदले समान ४–४ विकेट लिए। इंग्ल्यान्डले एक दिवसीय श्रृंखलामा आफ्ना प्रमुख खेलाडीहरुलाई विश्राम दिँदै नयाँ खेलाडीहरुलाई मौका दिएको थियो ।
हालै सम्पन्न एक दिवसीय विश्वकपमा खराव प्रदर्शन गरेको इंग्ल्यान्डले त्यसयता भने सुधारिएको प्रदर्शन गरिरहेको छ । एक दिवसीय श्रृंखलाको दोस्रो खेल आगामी शुक्रबार लन्डनमा हुनेछ ।
यसअघि भएको दुई टेस्टको श्रृंखला भने एक–एकको बराबरीमा सकिएको थियो।
Comments
Post a Comment