विश्वकप छनौटले नेपालीलाई खुसी दिनेछ - ज्ञानेन्द्र मल्ल

बैशाख १२ गते गएको भूकम्पबाट नराम्ररी धक्का पाएको नेपाल पुनर्निर्माणमा जुटिरहेको छ । नेपालीहरु सामान्य जीवनशैलीमा फर्कन संघर्ष गरिरहेका छन्। यस्तो बेला नेपाली राष्ट्रिय क्रिकेटका उपकप्तान ज्ञानेन्द्र मल्ल नेपाल विश्वकप टी-ट्वान्टीमा लगातार दोस्रो पटक छनौट भएमा नेपाली जनताको मुहारमा खुसी छाउनेमा आशावादी छन् । 'पहिलो कुरा त हामी यो प्रतियोगिताको  शीर्ष दुई स्थानमा रहेर विश्वकपका लागि छनौट हुन चाहान्छौं,' ज्ञानेन्द्रले ओमानसँगको अभ्यास खेलपछि क्रिक इन्फोसँग भने, 'सबैको एउटै लक्ष्य छ । हामी विश्वकपमा फेरि छनौट हुन चाहान्छौं र नेपाली जनताको मुहारमा मुस्कान ल्याउन चाहान्छौं ।'

सन् २०१३ मा युएईमा भएको छनौट खेलमा नेपालले तेस्रो स्थान हासिल गरेको थियो। पहिलो र दोस्रो स्थानमा आयरल्याण्ड र अफगानिस्तान थिए। हङ्कङसँगको सनसनीपूर्ण खेलमा अन्तिम बलमा विजय प्राप्त गर्दै नेपाल विश्वकपका लागि छनौट भएको थियो । बंगलादेशमा भएको विश्वकप टी-ट्वान्टी

प्रतियोगितामा नेपालले हङकङलाई जिते पनि बंगलादेशको हारका कारण नेपालको यात्रा पहिलो चरणमै रोकियो । यो अनुभवले नेपाली खेलाडीमा झन् भोक सिर्जना  गरेको छ र उनीहरु पहिलेकै स्थान फर्काउन झन् कडा मेहनत गरिरहेका छन् । प्रतियोगिताभन्दा दुई महिनापहिला आएको विनाशकारी भुकम्पले उनीहरुको तयारीलाई नेपालबाट भारत पुर्यायो । 'सलाम् केटाहरुलाई,' ज्ञानेन्द्रले भने, 'खेलाडीहरु जुन परिस्थितिबाट गुज्रेका थिए त्यसका बाबजुद पनि अभ्यासमा भिडे । हामी अभ्यासका दौरान सामान्य हुने प्रयास गरिरहेका थियौं। मेरो विचारमा, त्यो अवस्थामा पनि देशको लागि खेल्नका लागि टीमले राम्रो गरेको छ।'

ज्ञानेन्द्रले नेपालका लागि प्राय: तीन र चार नम्बरमा ब्याटिङ गर्छन् । तर उनी नेदरल्याण्ड्ससँगको टी-ट्वान्टी प्रतियोगिताका पहिला दुई खेलमा शुरुवाती ब्याट्सम्यानका रुपमा उत्रिए, जहाँ उनले क्रमश: २४ र १२ रन बनाए । नेपालका सबैभन्दा डायनामिक ब्याट्सम्यानका रुपमा रहेका मल्लले शुरुवाती ब्याट्सम्यानका रुपमा मौका पाए । यसले एउटा मोमेन्टम दिन सक्छ र सायद यो प्रतियोगिताका लागि नेपालको नयाँ रणनीतिका रुपमा प्रयोग पनि हुन्छ । 'मेरो विचारमा यो हामी कुन अवस्थाबाट गुज्रिन्छौं भन्नेमा भर पर्ने कुरा हो,' ओपनिङ ब्याट्सम्यानको भूमिकाका बारे मल्ल भन्छन्, 'हाम्रो शुरुवाती ब्याट्सम्यानका लागि हामी केही नयाँ प्रयोग गरिरहेका छौं र मेरो लागि यो विल्कुलै नयाँ र खेलको 'टोन' सेट गर्ने मौका हो ।' तर नेपाल मल्ल र कप्तान खड्कालाई मध्यक्रममै खेलाउन चाहान्छ । मल्ल भन्छन्, केही युवा ब्याट्सम्यानका लागि यो प्रतियोगिता नाम कमाउने मौका हुनेछ । 'टिममा केही खेलाडी छन्, जोसँग राम्रो क्षमता छ । मेरो विचारमा उनीहरु यो प्रतियोगिताबाट चम्किनेछन् तर हामीसँग कम अनुभव र 'एक्सपोजर' छ । बिस्तारै उनीहरु सिक्दैछन् र यो प्रतियोगितामा उनीहरुले उत्कृष्ट प्रदर्शन गर्नेछन्।'