निर्वाचनको मिति छिट्टै घोषणा
आयोगका पदाधिकारीले माघको दोस्रो साताभित्र आवश्यक ऐन, नियम कानुन उपलब्ध गराउन आग्रह गर्नुभएको छ। सरकार सबै पक्षको सहमति जुटाएर निर्वाचन घोषणा गर्ने तयारीमा जुटेको छ। मुलुकको आवश्यकता र चाहनालाई सम्बोधन गर्दै सरकारले निर्वाचनको मिति तय गर्दछ।”
युएइको राजधानी अवुधावीमा आयोजना गरिएको विश्व भविश्य ऊर्जा शिखर सम्मेलन, २०१७ मा भाग लिन १० सदस्यीय प्रतिनिधिमण्डलको नेतृत्व गरेर प्रधानमन्त्री यही माघ १ गते त्यसतर्फ प्रस्थान गरेका थिए।
नेपाल र युएइबीच कूटनीतिक सम्बन्ध स्थापना भएपछि सरकार प्रमुखको तहबाट भएको हालसम्मै उच्चस्तरीय भ्रमणको रुपमा आफूले लिएको प्रधानमन्त्रीले जानकारी गराए। प्रधानमन्त्रीले आफ्ना समकक्षी शेख मोहम्मद विन रसिद अल मोक्तुमसँग आपसीहित, द्विपक्षीय सहयोग एवम् नेपाली कामदारको सुरक्षा र भरपर्दो रोजगारीका विषयमा कुराकानी भएको बताए।
यही माघ ३ गते सम्मेलनलाई विशेष वक्ताका रुपमा सम्बोधन गर्दै प्रधानमन्त्रीले जैविक एवम् परम्परागत ऊर्जाको स्रोतमा निर्भर रहेको विश्व समुदायले आगामी दिनमा दिगो, भरपर्दो, धान्न सकिने ऊर्जाको सुनिश्चितताका लागि सबै मुलुकले साझा सङ्कल्प गर्नुपर्नेमा जोड दिए।
उहाँले सबै राष्ट्र र जनताले न्यायोचित रुपमा ऊर्जा उपभोग गर्न पाउने सुनिश्चिताको लागि जल, सौर्य वायु र थर्मल र अन्य नवीकरणीय ऊर्जाका स्रोत पत्ता लगाई तिनको समुचित विकास एवम् स्वच्छ प्रविधिको प्रयोग गर्न विश्वव्यापी रुपमा सहकार्य आवश्यक रहेकोमा जोड दिएको स्पष्ट पारे।
जलविद्युत्को विकास गर्न नेपालमा प्रचुर सम्भावना रहेको भन्दै प्रधानमन्त्रीले समकक्षी एवम् सम्मेलनमा सहभागी राष्ट्रका सरकार प्रमुख एवम् व्यापारी व्यवसायीलाई नेपालमा लगानीका लागि आह्वान गरेको जानकारी दिए।
सम्मेलनलाई काजकिस्तान, कोस्टारिका, मन्टेनेग्रो, पराग्वेलगायतका राष्ट्रका सरकार प्रमुखले सम्बोधन गर्नुभएको थियो भने अन्य मुलुकका सरकार प्रमुख एवम् उच्च पदस्थ अधिकारीको उपस्थिति रहेको थियो।
दुई मुलुकबीचको कूटनीतिक सम्बन्ध नयाँ उचाइमा
प्रधानमन्त्रीले ऊर्जासम्बन्धी उक्त शिखर सम्मेलनको औपचारिक निमन्त्रणाकै सिलसिलामा युएइका समकक्षी र अन्य उच्च पदस्थ राजनेतासँगको भेटघाटले दुई मुलुकबीचको सम्बन्ध नयाँ उचाइमा पुगेको पत्रकार सम्मेलनमा जानकारी दिए। “दुई मुलुकबीच रहँदै आएको मैत्रीपूर्ण एवम् सहयोगात्मक सम्बन्ध थप प्रगाढ बनाउने अवसरको रुपमा मैले भ्रमणलाई केन्द्रित गरे” प्रधानमन्त्रीले भने। २२ जनवरी १९७७ मा कूटनीतिक सम्बन्ध स्थापना भएको द्विपक्षीय सम्बन्ध ४० वर्ष पूरा भएको छ।
नेपाली युवालाई लामो समयदेखि रोजगारी प्रदान गर्दै आएको युएइको विकासमा नेपालीको ठूलो योगदान रहेको र नेपालीलाई रोजगारी प्रदान गरेर जीवनस्तर सुधार ल्याउनुका साथै विप्रेषणले मुलुकको अर्थतन्त्रमा समेत ठूलो योगदान गरेको प्रधानमन्त्रीको कथन थियो।
लगानी भित्र्याउन जोड
उहाँले द्विपक्षीय भेटवार्ताको क्रममा आफूले नेपालमा लगानीको वातावरण बनेकाले लगानी गर्न युएइका उद्योगी व्यापारी एवम् व्यवसायीलाई आग्रह गरेको जानकारी दिए। युएइले स्वच्छ, सफा र नवीकरणीय ऊर्जाको क्षेत्रमा गरेको विकास र त्यस्तो प्रविधिको उपयोग गरी नेपालमा पनि ऊर्जा क्षेत्रको विकास गर्न सकिने विषयमा द्विपक्षीय कुराकानी भएको र भूकम्प पछिको पुनः निर्माणमा सघाउन आफूले आग्रह गरेको प्रधानमन्त्रीले स्पष्ट पारे।
बमलाई रिहाइ गर्न आग्रह
प्रधानमन्त्रीले युवराज शेख मोहम्मद र समकक्षी शेख मोहम्मद विन रसिद अल मोक्तुमसँगको भेटवार्तामा मृत्युदण्डको सजाय पाई दुवईको केन्द्रीय कारागारमा सन् २००३ देखि बन्दी जीवन बिताइरहेका अमबरबहादुर बमलाई रिहाइ गर्न आग्रह गरेको बताए।
द्विपक्षीय छलफलको क्रममा युवराज र समकक्षीले तत्कालै सम्बन्धित पदाधिकारीलाई बमको रिहाइका लागि निर्देशन दिएको समेत प्रधानमन्त्रीले सञ्चारकर्मीलाई जानकारी दिए।
यस्तै उहाँले भ्रमणको क्रममा नेपाली कामदारले भोग्नुपरेको समस्या, महिला कामदारको समस्या र भ्रमण प्रवेशाज्ञामा नेपालीलाई पठाइ अलपत्र पार्नेलाई कारबाहीको दायरामा ल्याउन समेत पहल गरिएको उल्लेख गरे।
नेपालको प्रधानमन्त्रीको पहिलो औपचारिक भ्रमणले उच्चस्तरको राजनीतिक तहमा सम्पर्क स्थापित भई द्विपक्षीय सम्बनधलाई सुदृढ तुल्याउन मद्दत पुगेको र युएइको लगानी आकर्षण गर्न, पर्यटन प्रवद्र्धन गर्न एवम् रोजगारीका थप अवसर सिर्जना गर्न मद्दत पुग्ने विश्वास आफूले लिएको छु प्रधानमन्त्रीले भने।
नकारात्मक प्रवृत्तिले काम गर्दैन
प्रधानमन्त्रीले आफ्नो भ्रमणलाई लिएर नकारात्मक कोणबाट भएको प्रचार मुलुक र जनताको लागि समेत ग्राह्य नभएको बताए। उनले नेपाली सञ्चारमाध्यममा हरेक विषयलाई नकारात्मक कोणबाट मात्रै हेर्ने प्रवृत्तिको विकास भएको भन्दै त्यस्तो क्रियाकलाप गलत रहेको र कसैलाई फाइदा नगर्ने उल्लेख गरे।
Comments
Post a Comment